Ledig stilling som konservator/formidlar natur og kulturlandskap

100 % fast stilling, fordelt på Brudavolltunet i Ørsta og Naturmuseet i Sykkylven

Vil du arbeide med natur, kulturlandskap, kulturarv og formidling? Viti søkjer ein engasjert konservator med fagansvar for kulturlandskap og natursamlingar, og med hjarte for formidling.

Stillinga er knytt til Brudavolltunet i Ørsta og Naturmuseet i Sykkylven, med delt kontorstad mellom Volda/Ørsta og Sykkylven.

Den som vert tilsett vil ha ei sentral rolle i arbeidet med å utvikle og forvalte kulturlandskapet på den einbølte garden Brudavolltunet, og samstundes bidra til formidling, kunnskapsutvikling og samlingsforvaltning. Stillinga er kopla saman med fagansvaret for Naturmuseet i Sykkylven, med utstillingar, samlingar og formidling om natur på Sunnmøre.

Stillinga inneber både praktisk arbeid med skjøtsel av kulturlandskap, samhandling med frivillige og publikum - og evne til å rette merksemd mot samanhengar og utviklingstrekk mellom kulturlandskap, kulturarv og natur.

Den tilsette vil også vere ein del av formidlarteamet på Søre Sunnmøre, og kan ta ulike oppdrag i heile Viti.

Ein viktig del av arbeidet vil vere å bidra til å hente inn eksterne prosjektmidlar gjennom søknadsskriving og prosjektutvikling.

Stillinga gir også moglegheit til fagleg fordjuping og forsking. Forsking og dokumentasjonsarbeid knytt til musea sine samlingar og temaområde vil vere ein naturleg del av stillinga.

Stillinga skal ha ei koordinatorrolle for kontorfellesskapet på Søre Sunnmøre.

Arbeidsoppgåver

• Fagansvar for kulturlandskap og natursamlingar i Viti, med særleg ansvar for Brudavolltunet og Naturmuseet.

• Utvikle og gjennomføre formidlingstilbod for barn og unge, på Brudavolltunet, Sivert Aarflotmuseet og Naturmuseet.

• Planleggje og gjennomføre arrangement, publikumsaktivitetar og utstillingsprosjekt på Brudavolltunet, Sivert Aarflot og særleg på Søre Sunnmøre.

• Planleggje og gjennomføre arrangement, publikumsaktivitetar og utstillingsprosjekt på Naturmuseet i Sykkylven.

• Leggje til rette for medverknad og dialog med frivillige og publikum.

• Byggje og vedlikehalde faglege nettverk innan kulturlandskap og naturhistoriske museum.

• Arbeide med samlingar og dokumentasjon, særleg knytt til Brudavolltunet og Naturmuseet i Sykkylven.

• Bidra til kunnskapsproduksjon gjennom utstillingar, årbøker, artiklar, nettsider og sosiale medium.

• Delta i aktuelle utviklings- og forskingsprosjekt.

Vi søkjer deg som har:

• Mastergrad eller tilsvarande innan naturforvaltning, kulturlandskap, naturmangfald, agronomi, biologi, historie eller tilsvarande relevante fagområde. Vi ser også etter deg som har erfaring frå liknande arbeid.

• Erfaring frå formidling, kulturarvsarbeid, naturforvaltning, skjøtsel eller museumsarbeid.

• Interesse for forsking og kunnskapsproduksjon.

• Erfaring med, og engasjement for, formidling og arbeid med barn og unge.

• Interesse for frivillig arbeid og samskaping.

• God digital kompetanse.

Vi ønskjer også at du:

• Er initiativrik, framoverlent og idérik.

• Har god gjennomføringsevne og trivs både med sjølvstendig arbeid og samarbeid.

• Er strukturert, effektiv og ryddig.

• Kan handtere fleire prosjekt og prosessar samstundes.

• Har gode kommunikasjons- og samarbeidsevner.

• Meistrar norsk og engelsk, både skriftleg og munnleg. Nynorsk er arbeidsspråket i Viti.

• Har førarkort og tilgang på bil.

Personlege eigenskapar vert vektlagt

Vi tilbyr:

• Ei spennande og meiningsfull stilling i eit stort museum.

• Fagleg dedikerte kolleger

• Gode faglege og personlege utviklingsmoglegheiter

• 100% fast stilling, 37,5 timar i veka inkl. Spisepause

• God offentleg tenestepensjon gjennom KLP

• Fleksitid, med kjernetid mellom kl 1000-1400

• Fem veker ferie og fire ekstra feriedagar som er lagt til vesle julaftan, julaftan, onsdag i påskeveka og nyttårsaftan.

Stillinga er plassert i stillingskode Rådgjevar. Viti følgjer tariff i Virke, Landsoverenskomst for museer og andre kulturinstitusjoner.

Heimla i Politiregisterforskrifta § 34-16 om personar som skal utføre oppgåver i kulturinstitusjonar vil Viti krevje politiattest før tilsetting i stillinga.

Viti har arenaer fleire stader på Sunnmøre, og noko reiseverksemd må påreknast. Sidan kollektivtilbodet varierer vil det vere ein fordel om søkjaren har førarkort.

Stillinga ligg i Kulturhistorisk avdeling, og rapporterer til seksjonleiar for samling og bevaring.

Aktuelle kandidatar kan verte kalla inn til intervju og vi ynskjer då referansar, vitnemål og attestar.