Vil du utvikle fellesløysingane som heile Noreg brukar kvar dag?

Stilling

Seksjonssjef

Lokasjon

Leikanger, Oslo

Antall posisjoner

Sektor

Offentlig

Type ansettelse

Fulltid, Fast

Publisert

I dag

Søknadsfrist

23. nov.

Søk nå

Få påminnelse

14 dager igjen

Ved å be om påminnelse vil du motta en beskjed før søknadsfristen og annen viktig informasjon om stillingen.

Ditt navn

E-post

Vil du utvikle fellesløysingane som heile Noreg brukar kvar dag?

Digitaliseringsdirektoratet søkjer tre seksjonssjefar til den nye avdelinga for produktstyring. ID-porten, Altinn, Maskinporten, Digital postkasse og den kommande nasjonale digitale lommeboka er berande infrastruktur for innbyggjarar, næringsliv og offentlege verksemder. No byggjer vi ei avdeling som skal sjå til at produkta våre gir mest mogleg verdi – og vi treng leiarar som vil vere med på reisa.

Om oss

Digitaliseringsdirektoratet (Digdir) er regjeringa sitt fremste verktøy for raskare og meir samordna digitalisering av offentleg sektor. Vi er underlagt Digitaliserings- og forvaltningsdepartementet og forvaltar og utviklar fellesløysingar som blir brukte av millionar av innbyggjarar og tusenvis av verksemder.

Avdeling for produktstyring er ei av tre avdelingar i den nye divisjonen Produkt og tenester (PRT), som har om lag 155 tilsette. Divisjonen har ansvar for heilskapleg styring, forretningsutvikling, utbreiing og kontinuerleg forbetring av Digdir sine fellesløysingar, med sterkt fokus på sikkerheit, brukarbehov, kundedialog og realisering av samfunnsnytte. Dei to andre avdelingane er Brukaroppleving, oppfølging og utbreiing og Kontroll og produktstøtte.

Avdeling for produktstyring skal sikre at fellesløysingane blir styrte som produkt – frå strategi og forretningsmodellar, via planlegging og arkitektur, til måling av gevinstar. Avdelinga har tre seksjonar, og vi søkjer ein seksjonssjef til kvar av dei:

Produktstrategi og forretning - Produktstrategi, vegkart, målbilete og forretningsmodellar; forretningsutvikling og strategisk utvikling av produktporteføljen.

Gevinstrealisering og styringsunderlag - Planar for gevinstrealisering; måling av samfunns- og bruksgevinstar; styringsdata, utgreiingar og avgjerdsgrunnlag.

Planlegging og løysingsarkitektur - Løysingskonsept og løysingsarkitektur; utviklings- og leveranseplanlegging; produkteigarskap.

Seksjonssjefane rapporterer til avdelingsdirektør for produktstyring og inngår i leiargruppa i avdelinga.

Arbeidsoppgåver

Som seksjonssjef får du personal-, fag- og budsjettansvar for ein seksjon med fagspesialistar. Du skal:

Leie, utvikle og motivere medarbeidarane i seksjonen, og byggje ein kultur prega av tillit, læring og samarbeid.
Ha det overordna ansvaret for leveransane frå seksjonen innanfor ansvarsområdet som er skildra over.
Bidra til heilskapleg styring av fellesløysingane – frå strategi og vegkart, via planlegging og arkitektur, til gevinstrealisering.
Sikre gode styringsdata og avgjerdsgrunnlag for prioriteringar i produktporteføljen.
Samarbeide tett med dei andre avdelingane i divisjonen, mellom anna om brukarinnsikt, utbreiing, produktøkonomi og avtalar.
Samarbeide med departement, andre verksemder, næringsliv og europeiske partnarar.
Vere ein aktiv del av leiargruppa og bidra til å byggje den nye avdelinga og vidareutvikle Digdir.

Kvalifikasjonar

høgare utdanning på masternivå, til dømes innan teknologi, økonomi, samfunnsfag eller leiing. Bachelorgrad og særleg relevant leiarerfaring kan erstatte kravet om mastergrad
leiarerfaring, helst med personalansvar
erfaring med produktutvikling, produktstyring eller porteføljestyring av digitale tenester
god forståing for offentleg forvaltning og digitalisering
svært god munnleg og skriftleg framstillingsevne på norsk
god munnleg og skriftleg framstillingsevne på engelsk

Det er ein fordel om du har:
erfaring med forretningsutvikling, gevinstrealisering eller løysingsarkitektur, alt etter kva seksjon du søkjer
erfaring frå smidige utviklingsmiljø og tverrfaglege team
kjennskap til digital identitet, tillitstenester, datadeling eller andre fellesløysingar
erfaring frå europeisk eller internasjonalt samarbeid

Personlege eigenskapar

Vi ser etter deg som er ein tydeleg og inkluderande leiar, som gir medarbeidarane tillit og handlingsrom. Du tenkjer strategisk, men har òg gjennomføringskraft og evne til å ta avgjerder i komplekse landskap. Du byggjer gode relasjonar, samarbeider godt på tvers og er nysgjerrig på korleis teknologi kan skape verdi for brukarane.

Vi legg stor vekt på at du er personleg eigna.

Den som blir tilsett i stillinga må kunne sikkerheitsklarerast i samsvar med krav knytte til stillinga. Det vil også bli gjennomført bakgrunnssjekk av aktuelle kandidatar gjennom Semac som ein del av tilsetingsprosessen.

Vi tilbyr

ei sentral leiarrolle i bygginga av ei ny avdeling med stor samfunnsverdi
arbeid med nasjonal digital infrastruktur og europeisk samarbeid
leiarutvikling og gode høve til kompetanseheving
eit godt arbeidsmiljø med ein uformell tone og stor vilje til å skape noko saman
arbeidsoppgåver i eit fagfelt prega av høg utviklingstakt og eit spennande samfunnsoppdrag
familievennleg personalpolitikk
fleksitid, sommartid og moglegheit for to timar trening ukentlig i arbeidstida
løn som seksjonssjef i lønsspenn kr 950.000–1.150.000, avhengig av kvalifikasjonar, for særskilt kvalifiserte søkarar kan høgare løn vurderast
medlemskap i Statens pensjonskasse, med gode ordningar for pensjon, lån og forsikring

Stillingane kan ha arbeidsstad i Leikanger, Oslo eller Brønnøysund. Det må påreknast noko reiseverksemd.

Oppgi gjerne kva for ein av seksjonane du er mest interessert i.

Inkluderande arbeidsliv og mangfald

Vi har tru på at mangfald er ein viktig byggestein i eit godt, spennande og utviklande arbeidsmiljø, og vi oppfordrar alle kvalifiserte kandidatar til å søke. Rett kompetanse på rett stad er vår viktigaste prioritering når vi rekrutterer, og vi vil legge til rette for at personar med nedsett funksjonsevne også kan jobbe hos oss.

Vil du vite meir?

Synes du dette høyrest interessant ut og ønskjer nærare informasjon, kontakt gjerne

Jon Håkon Odd, Avdelingsdirektør Produktstyring
E-post: jonhakon.odd@digdir.no Telefon: 477 06 922

Vitnemål og attestar må følgje søknaden. Vi ber om at du hentar vitnemål frå Vitnemålsportalen direkte i Jobbnorge når du søkjer på stillinga. Har du teke heile eller delar av utdanninga di i utlandet, ber vi om godkjenning frå Direktoratet for høgare utdanning og kompetanse.

Søkarlister kan bli offentleggjorde i samsvar med offentleglova § 25. Dersom du ønskjer å reservere deg mot å bli oppført på den offentlege søkjarlista, må dette grunngjevast. Opplysningar kan bli offentleggjorde sjølv om du har bedt om å ikkje bli oppført på lista. Du vil i så fall bli varsla.

Sikkerheit i Digdir

Digdir forvaltar samfunnskritisk infrastruktur. Sikkerheit er derfor integrert i rekrutteringsprosessane hos oss. I stillingar som blir vurdert som sikkerheitskritiske, må du rekne med å få spørsmål knytt til sikkerheitsmessig skikkaheit i rekrutteringsprosessen. Vi nyttar Semac til bakgrunnssjekk i samband med våre tilsetjingar.